Evening Prayer

ಮ್ಹಜ್ಯಾ ದೆವಾ, ಮ್ಹಜ್ಯಾ ಸಾಯ್ಬಾ, | ಹಾಂವ್ ತುಜ್ಯಾ ಪಾಂಯಾಂಕ್ ಪಡ್ತಾಂ, | ಹಾಂವ್ ತುಕಾ ಅರ್ಗಾಂ ದಿತಾಂ, | ಅಂತಸ್ಕರ್ನಿಂ ನಮಸ್ಕಾರ್ ಕರ್ತಾಂ,| ವ್ಹಡ್ ತುಜೊ ಉಪ್ಕಾರ್ ಮಾನ್ತಾಂ,| ಕಿತ್ಯಾಕ್ ತುವೆಂ ಮ್ಹಾಕಾ ರಚ್ಲೊ ಮ್ಹಣ್, | ನೀಜ್ ಕ್ರಿಸ್ತಾಂವ್ ಕೆಲೊ ಮ್ಹಣ್; ಆಜ್ ಪರ್ಯಾನ್ ಸಾಂಬಾಳ್ಳೊ ಮ್ಹಣ್,| ಜಶಿ ಬರಿ ರಾತ್ ದಿಲಿ,| ತಸೊ ಬರೊ ದೀಸ್ ದಿ ಸಾಯ್ಬಾ| (ಜಸೊ ಬರೊ ದೀಸ್ ದಿಲೊ, ತಶಿ ಬರಿ ರಾತ್ ದಿ ಸಾಯ್ಬಾ) ಮ್ಹಜೊ ಅತ್ಮೊ, ಮ್ಹಜಿ ಕೂಡ್, ತುಜ್ಯಾ ಹಾತಾಂತ್ ದಿತಾಂ | ಮ್ಹಜಿಂ ಚಿಂತ್ನಾಂ, ಮ್ಹಜೆ ಸಬ್ದ್, | ಮ್ಹಜೆ ಆಯ್ಚ್ಯಾ ದಿಸಾಚೆ (ಆಯ್ಚ್ಯೆ ರಾತಿಚೆ) ಕಷ್ಟ್ ಆನಿ ಕರ್ನ್ಯೊ, | ತುಕಾ ಸಮರ್ಪಿತಾಂ, ತುಜ್ಯಾ ವ್ಹಡಾ ಮಾನಾಕ್, ಮ್ಹಜ್ಯಾ ಪಾತ್ಕಾಂಚ್ಯಾ ಫಾರಿಕ್ಪಣಾಕ್. ಮ್ಹಜ್ಯಾ ಜೆಜು, | ತುಜ್ಯಾ ಖುರ್ಸಾಚ್ಯಾ, ಕಷ್ಟಾಂಚ್ಯಾ ಆನಿ ಮರ್ಣಾಚ್ಯಾ ಪುನ್ಯಾ ಪಾಸತ್ | ಭಗ್ಶಿ ಮ್ಹಜಿಂ ಸಮೆಸ್ತ್ ಪಾತ್ಕಾಂ, | ಮ್ಹಜಿ ಪಾತ್ಕ್ಯಾಚಿ ಕಾಕುಳ್ತ್ ಕರ್.
ದೆವಾ, ಪವಿತ್ರ್ ಅತ್ಮ್ಯಾ, | ದಿ ಸಾಯ್ಬಾ, ತುಜಿ ಕುರ್ಪಾ ಆಯ್ಚ್ಯಾ ದಿಸಾ (ಆಯ್ಚ್ಯೆರಾತಿಂ) ಪಾತ್ಕಾಂತ್ ಹಾಂವೆಂ ಪಡನಾ ಜಾಂವ್ಚ್ಯಾಕ್, | ತುಜೆ ಉಪದೆಸ್ ಸಾಂಬಾಳುಂಕ್, ಮ್ಹಜೆ ಕಾಯ್ದೆ ಪಾಳುಂಕ್, | ಮ್ಹಜಿ ಪಾತ್ಕ್ಯಾಚಿ ಕಾಕುಳ್ತ್ ಕರ್, | ಮ್ಹಾಕಾ ಪಾತ್ಕ್ಯಾಕ್ ಭಗ್ಶಿ.

ಸರ್ವೆಸ್ಪರಾ ದೆವಾ, | ತುಂ ಎಕ್ ಚ್ ದೇವ್ | ಆನಿ ಎಕಾ ದೆವಾ ಥಂಯ್ ತೇಗ್ ಜಣ್, | ಬಾಪ್, ಪೂತ್ ಆನಿ ಪವಿತ್ರ್ ಅತ್ಮೊ ಮ್ಹಣ್| ಹಾಂವ್ ಥಿರ್ ಸತ್ಮಾನ್ತಾಂ. | ತುಜೊ ದೈವಿಕ್ ಪೂತ್ ಮನಿಸ್ ಜಾಲೊ| ಆನಿ ಆಮ್ಚ್ಯಾ ಪಾತ್ಕಾಂ ಖಾತಿರ್ ಮೆಲೊ| ಆನಿ ಜಿವ್ಯಾಂಚಿ ಆನಿ ಮೆಲ್ಲ್ಯಾಂಚಿ ಮನ್ಸುಬಿ ಕರುಂಕ್ ಯೆತಲೊ ಮ್ಹಣ್ | ಹಾಂವ್ ಸತ್ಮಾನ್ತಾಂ. | ಹಿಂ ಸತಾಂ |ಆನಿ ಕಥೊಲಿಕ್ ಪವಿತ್ರ್ ಸಭಾ ಶಿಕಯ್ತಾ ತಿಂ ಸರ್ವ್ ಸತಾಂ| ಹಾಂವ್ ಸತ್ಮಾಂದ್ತಾಂ | ಕಿತ್ಯಾಕ್ ತುಂ ಸಾಸ್ಣಿಕ್ ಸತ್ ಆನಿ ಜಾಣ್ವಾಯ್ | ಆನಿ ತುವೆಂ ತಿಂ ಉಗ್ಡಾಪಿಂ ಕೆಲ್ಯಾಂತ್;| ತುಂ ಫಟಯ್ನಾಂಯ್ ವಾ ಫಟ್ವುನ್ ಪಡನಾಂಯ್. | ಹ್ಯಾ ಭಾವಾಡ್ತಾಂತ್ ಜಿಯೆಂವ್ಕ್ ಆನಿ ಮರುಂಕ್| ಹಾಂವ್ ಖುಶಿ ವ್ಹರ್ತಾಂ. | ಆಮೆನ್.

ಸರ್ವೆಸ್ಪರಾ ದೆವಾ, | ತುಜ್ಯೆ ಕುರ್ಪೆನ್ | ಸರ್ವ್ ಮ್ಹಜ್ಯಾ ಪಾತ್ಕಾಂಚೆಂ ಭಗ್ಸಣೆಂ | ಆನಿ ಹ್ಯೆ ಜಿಣಿಯೆ ಉಪ್ರಾಂತ್ | ಸಾಸ್ಣಿಕ್ ಸುಖ್ ಜೊಡ್ತಲೊಂ/ಲಿಂ ಮ್ಹಣ್ | ಹಾಂವ್ ಭರ್ವಸ್ತಾಂ, | ಕಿತ್ಯಾಕ್ ತುಂ ಸರ್ವ್ ಪದ್ವೆದಾರ್, ವಿಸ್ವಾಶಿ, ದಯಾಳ್ ಆನಿ ಕಾಕುಳ್ತ್ದಾರ್ | ಆನಿ ತುವೆಂ ತೆಂ ಭಾಸಾಯ್ಲಾಂ. | ಹ್ಯಾ ಭರ್ವಶ್ಯಾಂತ್ ಜಿಯೆಂವ್ಕ್ ಆನಿ ಮರುಂಕ್ | ಹಾಂವ್ ಖುಶಿ ವ್ಹರ್ತಾಂ. | ಆಮೆನ್.

ಸರ್ವೆಸ್ಪರಾ ದೆವಾ, | ಸರ್ವ್ ವಸ್ತುಂ ಪ್ರಾಸ್ ಚಡ್ | ಹಾಂವ್ ತುಜೊ ಮೋಗ್ ಕರ್ತಾಂ | ಆನಿ ತುಜ್ಯೆ ಪಾಸತ್ | ಮ್ಹಜ್ಯಾ ಪೆಲ್ಯಾಚೊ ಹಾಂವ್ ಮೋಗ್ ಕರ್ತಾಂ, | ಕಿತ್ಯಾಕ್ ತುಂ ವರ್ತೊ, ಅಪರಿಮಿತ್ ಆನಿ ಸರ್ವ್ ಬರೊ | ಆನಿ ಸರ್ವ್ ಮೋಗ್ ತುಕಾ ಫಾವೊ | ಹ್ಯಾ ಮೊಗಾಂತ್ ಜಿಯೆಂವ್ಕ್ ಆನಿ ಮರುಂಕ್| ಹಾಂವ್ ಖುಶಿ ವ್ಹರ್ತಾಂ | ಆಮೆನ್.

ಮ್ಹಜ್ಯಾ ದೆವಾ, | ಸಗ್ಳ್ಯಾ ಮ್ಹಜ್ಯಾ ಕಾಳ್ಜಾನ್ | ಸರ್ವ್ ಮ್ಹಜ್ಯಾ ಪಾತ್ಕಾಂಚಿ ಹಾಂವ್ ದುಖ್ ಧರ್ತಾಂ | ಆನಿ ತಿಂ ಕಾಂಟಾಳ್ತಾಂ,| ಕಿತ್ಯಾಕ್ ತಾಂಚ್ಯೆ ವರ್ವಿಂ | ತುಜಿ ನಿತಿಚಿ ಶಿಕ್ಷಾ ಮ್ಹಾಕಾ ಫಾವೊ ಜಾಲಿ, | ಪೂಣ್ ಚಡ್ ಕರುನ್ | ತುಕಾ‌ ಭೊವ್ ಬರ್ಯಾ | ಆನಿ ಸರ್ವ್ ವಸ್ತುಂ ಪ್ರಾಸ್ ಚಡ್ ಮೋಗ್. ಫಾವೊ ಜಾಲ್ಲ್ಯಾ ದೆವಾಕ್ | ಹಾಂವೆಂ ಅಕ್ಮಾನ್ ಕೆಲೊ. | ದೆಕುನ್ ತುಜ್ಯೆ ಕುರ್ಪೆಚ್ಯಾ ಆಧಾರಾನ್ | ಆನಿ ಮುಕಾರ್ ಪಾತಕ್ ಕರಿನಾಂ ಮ್ಹಣ್ | ಆನಿ ಪಾತ್ಕಾಚೆ ಸಮಯೆ ಚುಕಯ್ತಲೊಂ/ಲಿಂ ಮ್ಹಣ್ | ಥಿರ್ ನಿಚೆವ್ ಕರ್ತಾಂ | ಆಮೆನ್.

ಪಯ್ಲೊಮಿಸ್ತೆರ್ : ಮರಿಯೆಕ್ ಭಡ್ವೊ ಬರಿ ಖಬರ್ ದಿತಾ
ದುಸ್ರೊಮಿಸ್ತೆರ್ : ಮರಿ ಎಲಿಜಾಬೆತಿಚಿ ಭೆಟ್ ಕರ್ತಾ
ತಿಸ್ರೊಮಿಸ್ತೆರ್ : ಬೆತ್ಲೆಹೆಮಾಂತ್ ಜೆಜು ಜಲ್ಮತಾ
ಚವ್ತೊಮಿಸ್ತೆರ್ : ಮರಿ, ಬಾಳಕ್ ಜೆಜುಕ್ ತೆಂಪ್ಲಾಂತ್ ಭೆಟಯ್ತಾ
ಪಾಂಚ್ವೊಮಿಸ್ತೆರ್ : ಚುಕ್ ಲ್ಲೊ ಭುರ್ಗೊ ಜೆಜು, ತೆಂಪ್ಲಾಂತ್ ಮೆಳ್ತಾ.

ಪಯ್ಲೊಮಿಸ್ತೆರ್ : ಸೊಮಿ ಜೆಜು ಮೊಳ್ಯಾಂತ್ ಮಾಗ್ತಾನಾ ರಗತ್ ಘಾಮೆತಾ.
ದುಸ್ರೊಮಿಸ್ತೆರ್ : ಸೊಮ್ಯಾ ಜೆಜುಕ್ ಖಾಂಬ್ಯಾಕ್ ಭಾಂದುನ್ ಜೆರ್ಬಾಂದಾಂನಿ ಮಾರ್ತಾತ್.
ತಿಸ್ರೊಮಿಸ್ತೆರ್ : ಸೊಮ್ಯಾ ಜೆಜುಚ್ಯಾ ಮಸ್ತಕಾರ್ ಕಾಂಟ್ಯಾಂಚೊ ಮುಕುಟ್ ಸಾಣ್ಶಿತಾತ್.
ಚವ್ತೊಮಿಸ್ತೆರ್ : ಸೊಮಿ ಜೆಜು, ಕಾಲ್ವಾರ್ ಪರ್ವತ್ ಪರ್ಯಾನ್ ಖುರಿಸ್ ವ್ಹಾವೊವ್ನ್ ವೆತಾ.
ಪಾಂಚ್ವೊಮಿಸ್ತೆರ್ : ಸೊಮಿ ಜೆಜು, ಖುರ್ಸಾರ್ ಉಮ್ಕಾಳುನ್ ಆಪ್ಲ್ಯೆ ಮಾಯೆ ಮುಕಾರ್ ಪ್ರಾಣ್ ಕರ್ತಾ.

ಪಯ್ಲೊ ಮಿಸ್ತೆರ್ : ಸೊಮಿ ಜೆಜು ಪುನರ್ಜಿವಂತ್ ಜಾತಾ
ದುಸ್ರೊ ಮಿಸ್ತೆರ್ : ಸೊಮಿ ಜೆಜು ಸರ್ಗಾರ್ ಚಡ್ತಾ
ತಿಸ್ರೊ ಮಿಸ್ತೆರ್ : ಪವಿತ್ರ್ ಅತ್ಮೊ ಆಂಕ್ವಾರ್ ಮರಿಯೆಚೆರ್ ಆನಿ ಆಪೊಸ್ತಲಾಂಚೆರ್ ದೆಂವ್ತಾ
ಚವ್ತೊ ಮಿಸ್ತೆರ್ : ಆಂಕ್ವಾರ್ ಮರಿಯೆಕ್ ಕುಡಿ ಅತ್ಮ್ಯಾ ಸಮೆತ್ ಸರ್ಗಾರ್ ಘೆತಾತ್
ಪಾಂಚ್ವೊ ಮಿಸ್ತೆರ್ : ಆಂಕ್ವಾರ್ ಮರಿಯೆಕ್ ಸರ್ಗಾಸಂಸಾರಾಚಿ ರಾಣಿ ಮ್ಹಣ್ ಕುರ್ವಾರ್ ಕರ್ತಾತ್.

ಪಯ್ಲೊಮಿಸ್ತೆರ್ : ಜೆಜು ಜೊರ್ದಾನ್ ನ್ಹಂಯ್ತ್ ಸ್ನಾನ್ ಘೆತಾ.
ದುಸ್ರೊ ಮಿಸ್ತೆರ್ : ಜೆಜು ಕಾನಾ ಶಹರಾಂತ್ಲ್ಯಾ ಲಗ್ನಾಂತ್ ಆಪ್ಲಿ ಮಹಿಮಾ ಪರ್ಗಟ್ತಾ
ತಿಸ್ರೊ ಮಿಸ್ತೆರ್ : ಜೆಜು ದೆವಾಚೆಂ ಸರ್ಗಿಂಚೆಂ ರಾಜ್ಯ್ ಪರ್ಗಟ್ತಾ ಆನಿ ಪಾತ್ಕಿ ಜಿಣಿ ಬದ್ಲುಂಕ್ ಉಲೊ ದಿತಾ.
ಚವ್ತೊ ಮಿಸ್ತೆರ್ : ಜೆಜು, ತಾಬೊರ್ ಪರ್ವತಾರ್ ರುಪಾಂತರ್ ಜಾತಾ
ಪಾಂಚ್ವೊ ಮಿಸ್ತೆರ್: ಜೆಜು ಭೊವ್ ಪವಿತ್ರ್ ಎವ್ಕರಿಸ್ತ್ ಘಡ್ತಾ.

ನಮನ್ ರಾಣಿಯೆ, ಕಾಕುಳ್ತಿಚ್ಯೆ ಮಾಯೆ; | ನಮನ್ ಆಮ್ಚ್ಯಾ ಜಿವಾ, ಅಮೃತಾ ಆನಿ ಭರ್ವಶಾ, | ತುಕಾ ಆಮಿ ಉಲೊ ಮಾರ್ತಾಂವ್, ಆಮಿ ಪರ್ದೆಶಿ ಎವೆಚಿಂ ಬಾಳ್ಕಾಂ. | ಹ್ಯಾ ದುಖಾಚ್ಯಾ ಕೊಂಡಾಂತ್ ಆಸ್ತಾಂ | ಅಸ್ಕಾರ್ ಹುಸ್ಕಾರ್ ಸೊಡುನ್| ಆಮಿ ತುಕಾ ರುದಾನ್ ಕರ್ತಾಂವ್. | ತರ್ ತುಂ, ಆಮ್ಚ್ಯೆ ಶೆಕಾಯೆ,|ತೆ ತುಜ್ಯೆ ಕಾಕುಳ್ತಿಚೆ ದೊಳೆ ಆಮ್ಚೆ ವಯ್ರ್ ಪರ್ತಿ| ಆನಿ ಹ್ಯಾ ಪರ್ದೆಶಾ ಉಪ್ರಾಂತ್ | ತುಜ್ಯೆ ಕುಶಿಚೆಂ ಸದೆಂವಿ ಫಳ್, ಜೆಜು, ಆಮ್ಕಾಂ ದಾಕಯ್, | ಯೆ ದಯಾಳಿ, ಯೆ ಮೊಗಾಳಿ, ಯೆ ದುಲೊಬಿ ಆಂಕ್ವಾರಿ ಮರಿಯೆ.

V: ಭಾಗೆವಂತಿ ದೆವಾಚ್ಯೆ ಮಾಯೆ, ಆಮಾ ಪಾಸತ್ ವಿನತಿ ಕರ್
R: ಆನಿ ಕ್ರಿಸ್ತಾಚ್ಯೊ ಭಾಸಾವ್ಣ್ಯೊ ಆಮ್ಕಾಂ ಫಾವೊ ಕರ್.

ಸೊಮ್ಯಾ ಕಾಕುಳ್ತ್ ಕರ್ -2
ಕ್ರಿಸ್ತಾ ಕಾಕುಳ್ತ್ ಕರ್ - 2
ಸೊಮ್ಯಾ ಕಾಕುಳ್ತ್ ಕರ್ - 2
ಕ್ರಿಸ್ತಾ ಆಯ್ಕ್ ಆಮ್ಕಾಂ - 2
ಕ್ರಿಸ್ತಾ ದಯೆನ್ ಆಯ್ಕ್ ಆಮ್ಕಾಂ - 2

ಸರ್ಗಿಂಚ್ಯಾ ದೆವಾ ಬಾಪಾ, ಕಾಕುಳ್ತ್ ಆಮ್ಚಿ ಕರ್
ದೆವಾ ಪುತಾ, ಸಂಸಾರಾಚ್ಯಾ ತಾರಕಾ, ಕಾಕುಳ್ತ್ ಆಮ್ಚಿ ಕರ್
ದೆವಾ ಪವಿತ್ರ್ ಅತ್ಮ್ಯಾ, ಕಾಕುಳ್ತ್ ಆಮ್ಚಿ ಕರ್
ಸಾಂತಿಸ್ಸಿಮಾ ತ್ರಿಂದಾದಿ ಎಕಾಚ್ ದೆವಾ, ಕಾಕುಳ್ತ್ ಆಮ್ಚಿ ಕರ್

ಜವಾಬ್: ಆಮಾ ಪಾಸತ್ ವಿನತಿ ಕರ್
ಭಾಗೆವಂತಿ ಮರಿಯೆ
ಭಾಗೆವಂತಿ ದೆವಾಚ್ಯೆ ಮಾಯೆ
ಭಾಗೆವಂತಿ ಆಂಕ್ವಾರಿಂಚ್ಯೆ ಆಂಕ್ವಾರಿ
ಕ್ರಿಸ್ತಾಚ್ಯೆ ಮಾಯೆ
ಪವಿತ್ರ್ ಸಭೆಚ್ಯೆ ಮಾಯೆ
ಕಾಕುಳ್ತಿಚ್ಯೆ ಮಾಯೆ
ದೇವ್ ಕುರ್ಪೆಚ್ಯೆ ಮಾಯೆ
ಭರ್ವಶಾಚ್ಯೆ ಮಾಯೆ
ಭೊವ್ ನಿತಳಿ ಮಾಯೆ
ಭೊವ್ ನಿಸ್ಕಳ್ವಂತಿ ಮಾಯೆ
ಖತ್ ನಾಸ್ಲಲ್ಯೆ ಮಾಯೆ,
ಆಪುಟ್ ಮಾಯೆ
ಮೊಗಾಪಾತ್ರ್ ಮಾಯೆ
ವಿಚಿತ್ರ್ ಮಾಯೆ
ಸುಭೊದಿನಿ ಮಾಯೆ
ರಚ್ನಾರಾಚ್ಯೆ ಮಾಯೆ
ಸೊಡ್ವಣ್ದಾರಾಚ್ಯೆ ಮಾಯೆ
ಭೊವ್ ಶಾಣಿ ಆಂಕ್ವಾರಿ
ಮಾನಾಪಾತ್ರ್ ಆಂಕ್ವಾರಿ
ಪರ್ಗಟುಂಕ್ ಫಾವೊ ಜಾಲಲ್ಯೆ ಆಂಕ್ವಾರಿ
ಪದ್ವೆದಾರ್ ಆoಕ್ವಾರಿ
ದಯಾಳಿ ಆಂಕ್ವಾರಿ
ವಿಶ್ವಾಶಿ ಆಂಕ್ವಾರಿ
ನಿತಿಚ್ಯಾ ಆಸ್ರ್ಯಾ
ಜಾಣ್ವಾಯೆಚ್ಯಾ ಸಿಯಾಸಣಾ
ಆಮ್ಚ್ಯಾ ಸಂತೊಸಾಚ್ಯಾ ಕಾರಣಾ
ಅತ್ಮಿಕ್ ಪಂಲ್ಗಣಾ
ಮಾನ್ ಫಾವೊ ಜಾಲ್ಲ್ಯಾ ಪಂಲ್ಗಣಾ
ಭಕ್ತಿಚ್ಯಾ ಅಪರಿಮಿತ್ ಪಂಲ್ಗಣಾ
ಗುಪ್ತ್ ಗುಲೊಬಾ
ದಾವಿದಾಚ್ಯಾ ಭುರ್ಜಾ
ದಾಡ್ಯಾಚ್ಯಾ ಭುರ್ಜಾ
ಸುವರ್ಣಾಚ್ಯಾ ಮಂದಿರಾ
ಸೊಲ್ಲ್ಯಾಚ್ಯಾ ಆರ್ಕಾ
ಸರ್ಗಿಂಚ್ಯಾ ದಾರ್ವಟ್ಯಾ
ಫಾಂತ್ಯಾಫಾರಾಚ್ಯಾ ನೆಕೆತ್ರಾ
ಪಿಡೆಸ್ತಾಂಚ್ಯೆ ಭಲಾಯ್ಕೆ
ಪಾತ್ಕ್ಯಾಂಚ್ಯಾ ಆಸ್ರ್ಯಾ
ಥಳಾಂತರ್ಕಾರಾಂಚ್ಯೆ ಶೆಕಾಯೆ
ದುಖೆಸ್ತಾಂಚ್ಯೆ ಬುಜಾವಣೆ
ಕ್ರಿಸ್ತಾಂವಾಂಚ್ಯಾ ಆಧಾರಾ
ಭಡ್ವ್ಯಾಂಚ್ಯೆ ರಾಣಿಯೆ
ಪಾತ್ರಿಯಾರ್ಕಾಂಚ್ಯೆ ರಾಣಿಯೆ
ಪ್ರವಾದಿಂಚ್ಯೆ ರಾಣಿಯೆ
ಆಪೊಸ್ತಲಾಂಚ್ಯೆ ರಾಣಿಯೆ
ಮಾರ್ಥಿರಾಂಚ್ಯೆ ರಾಣಿಯೆ
ಕೊನ್ಫೆಸೊರಾಂಚ್ಯೆ ರಾಣಿಯೆ
ಆಂಕ್ವಾರಿಂಚ್ಯೆ ರಾಣಿಯೆ
ಸಮೆಸ್ತ್ ಭಕ್ತಾಂಚ್ಯೆ ರಾಣಿಯೆ
ಸಂಯ್ಭಾಚ್ಯಾ ಖತಾವಿಣ್ ಗರ್ಭಿಂ ಸಂಭವ್ಲಲ್ಯೆ ರಾಣಿಯೆ
ಸರ್ಗಿಂ ಘೆತ್ಲಲ್ಯೆ ರಾಣಿಯೆ
ಭೊವ್ ಪವಿತ್ರ್ ರೊಜಾರಿಚ್ಯೆ ರಾಣಿಯೆ
ಕುಟ್ಮಾಚ್ಯೆ ರಾಣಿಯೆ
ಸಮಾಧಾನಾಚ್ಯೆ ರಾಣಿಯೆ

ದೆವಾಚ್ಯೆ ಶೆಳಿಯೆ ಸಂಸಾರಾಚೆಂ ಪಾಪ್ ಕಾಡ್ತಲ್ಯೆ,
ಭಗಸ್ ಆಮ್ಕಾಂ, ಸೊಮ್ಯಾ

ದೆವಾಚ್ಯೆ ಶೆಳಿಯೆ ಸಂಸಾರಾಚೆಂ ಪಾಪ್ ಕಾಡ್ತಲ್ಯೆ
ದಯೆನ್ ಆಯ್ಕ್ ಆಮ್ಕಾಂ, ಸೊಮ್ಯಾ

ದೆವಾಚ್ಯೆ ಶೆಳಿಯೆ ಸಂಸಾರಾಚೆಂ ಪಾಪ್ ಕಡ್ತಲ್ಯೆ,
ಕಾಕುಳ್ತ್ ಆಮ್ಚಿ ಕರ್.

ತುಜ್ಯೆ ಸಸಾಯೆ ಖಾಲ್, ಏ ದೆವಾಚ್ಯೆ ಭಾಗೆವಂತಿ ಮಾಯೆ, ಆಮಿ ಯೆತಾಂವ್; ಆಮ್ಚ್ಯಾ ಗರ್ಜಾಂತ್, ಆಮ್ಚ್ಯಾ ಮಾಗ್ಣ್ಯಾಚಿ ಬೆಪರ್ವಾ ಕರಿನಾಕಾ. ಪೂಣ್ ಸಮೆಸ್ತ್ ವಿಘ್ನಾಂತ್ಲಿಂ ಆಮ್ಕಾಂ ಸದಾಂಚ್ ನಿವಾರ್, ಅನಂದ್ಭರಿತ್ ಆನಿ ಸದೆಂವಿ ಆಂಕ್ವಾರಿ.
V: ಭಾಗೆವಂತಿ ದೆವಾಚ್ಯೆ ಮಾಯೆ, ಆಮಾ ಪಾಸುನ್ ವಿನತಿ ಕರ್.
R: ಆನಿ ಕ್ರಿಸ್ತಾಚ್ಯೊ ಭಾಸಾವ್ಣ್ಯೊ ಆಮ್ಕಾಂ ಫಾವೊ ಕರ್.

ಪ್ರಾರ್ಥುಂಯಾ
ಏ ದೆವಾ, ತುಜ್ಯಾ ಎಕ್ಲ್ಯಾಚ್ ಪುತಾನ್, ಆಪ್ಲ್ಯೆ ಜಿಣಿಯೆ, ಮರ್ಣಾ ಆನಿ ಪುನರ್ಜಿವಂತ್ಪಣಾ ವರ್ವಿಂ, ಸಾಸ್ಣಾಚ್ಯೆ ಬಚಾವೆಚೆಂ ಇನಾಮ್ ಆಮ್ಕಾಂ ಜೊಡ್ನ್ ದವರ್ಲಾಂ; ಭಾಗೆವಂತ್ ಆಂಕ್ವಾರ್ ಮರಿಯೆಚೆ, ಭೊವ್ ಪವಿತ್ರ್ ರೊಜಾರಿಚೆ ಮಿಸ್ತೆರ್ ಆಮಿ ನಿಯಾಳ್ತಾನಾ, ತಾಂತುಂ ಆಟಾಪ್ಲಲ್ಯಾಚೊ ಆಮಿ ಪಾಟ್ಲಾವ್ ಕರಿಸೊ ಆನಿ ತಾಂತುಂ ಭಾಸಾಯ್ಲಲೆಂ ಆಮಿ ಜೊಡಿಶೆಂ ಕರ್ ಮ್ಹಣ್ ಆಮಿ ತುಜ್ಯೆ ಲಾಗಿಂ ಪರಾತ್ತಾಂವ್. ತ್ಯಾಚ್ ಕ್ರಿಸ್ತಾ ಆಮ್ಚ್ಯಾ ಸೊಮ್ಯಾ ವರ್ವಿಂ. ಆಮೆನ್.